希慎撐學生電影今首映 沈祖堯馬斐森睇《爭氣》

Home / 未分類 / 希慎撐學生電影今首映 沈祖堯馬斐森睇《爭氣》

希慎撐學生電影今首映 沈祖堯馬斐森睇《爭氣》

BY 李華華

好多富豪設有家族基金做慈善工作,銅鑼灣大業主希慎(014)貫徹低調作風,大股東持有嘅利希慎基金雖然成立41年,但如果唔係贊助紀錄片《爭氣》,都冇乜人留意。套戲今日首映,講一班中學生透過做一齣音樂劇蛻變,撞正學生們正日夜瞓街爭取真普選,製作公司又請埋中大校長沈祖堯與港大校長馬斐森去睇首映,真係好難唔拉上佔中喎!

唔擔心佔中拖累票房

商界對於佔中,唔係反對,就係避而不談,所以呢排都冇乜公司搞活動,公司管理層都免得出嚟回應佔中。

利希慎基金總裁何宗慈(Cecilia)知道唔可以一句「no comment」打發華華,噚日見面時好認真咁回應話,基金做慈善工作為主,本身屬政治中立,加上《爭氣》係講一班學生嘅成長,人與人之間嘅關係,同佔中冇關。又由於電影所有收入都撥作慈善用途,佢根本唔擔心佔中會否拖累票房。

1973年成立嘅利希慎基金今次係首次贊助紀錄片,Cecilia指,利希慎基金主要支持教育、藝術文化、環保同埋社會福利4個範疇,理事會有6位利家嘅成員,佢哋主要係利家第三代成員,包括做過希慎董事總經理、現任馬會董事嘅利子厚,仲有希慎非執董利乾、利憲彬,利憲彬係希慎主席利蘊蓮細佬,利蘊蓮並非基金董事會,實行各施其職。

理事會6位理事每年開會4次,Cecilia與3位全職同事平日會評估各個慈善項目建議,認為合適嘅,就係遞上董事會討論。Cecilia指,6位利家成員從來冇爭拗,啱就做,唔啱就再諗,加上佢哋各自有慈善基金,「如果基金呢個平台唔啱,佢哋可以自己做」。大家族做慈善都有自己一套。

打理慈善基金  何宗慈不脫賓架本色

一望姓氏,大概估到何宗慈並非利家成員,佢做銀行賓架31年,2012年中決定轉行,幫利希慎家族打理慈善基金,人工當然少一截,但佢認為合理。多年銀行經驗,令佢做慈善項目都會做盡職審查。佢以支持拍攝《爭氣》為例,奧斯卡女導演楊紫燁舊年搵佢傾合作,由於呢套紀錄片講一班被認為讀書唔成嘅中學生,點樣透過參加一套本地音樂劇而蛻變,Cecilia會觀察楊導演點樣跟學生相處同拍攝情況,確保結果符預期。

中環在線:希慎撐學生電影今首映 沈祖堯馬斐森睇《爭氣》

原載:中環在線 蘋果日報,2014年10月7日

Recent Posts
Contact Us

We're not around right now. But you can send us an email and we'll get back to you, asap.

Not readable? Change text. captcha txt

Start typing and press Enter to search