拍青年上進精神 林鄭推介《爭氣》

聖誕節就到，大家都陸續喺唔同地方聽到頌歌隊報佳音。兒童發展配對基金發動嘅「聖誕頌歌節2014」噚日舉行開幕禮，電影《爭氣》同音樂劇《逆風》入面嘅青少年亦到場一齊唱聖誕歌，而政務司長林鄭月娥噚日出席活動時，仲幫《爭氣》賣廣告，話前幾日去睇咗，令佢深受感動，覺得大家都值得入戲院睇呢套戲。

政務司長林鄭月娥（後排中）出席「聖誕頌歌節2014」開幕禮，同小朋友合照，令近日嚴肅嘅佢都變得特別輕鬆，佢仲推介人睇《爭氣》呢套電影。後排右為勞福局長張建宗。（盧翊銘攝）

官員組聖誕頌歌隊

林太話，呢套戲反映青年向上精神，佢話政府都好關心青少年付出，會不遺餘力做青年工作。據聞早幾日林太睇呢套劇，係政府內部包場，除咗林太及公務員，扶貧委員會成員都有份。《爭氣》係本土紀錄片，講一班Band 3學生喺戲劇訓練中成長。

今屆參加聖誕頌歌節嘅人數超過1.2萬，將會喺本月13至24日，喺全港舉行超過210場表演，歌隊成員除咗嚟自各階層、有小朋友外，仲有12名官員，好似發展局長陳茂波、商務及經濟發展局長蘇錦樑等，以及多支由公務員組成嘅頌歌隊，佢哋會分別出席各場頌歌活動。

原載：《明報》，2014年12月8日